കരയാതെ ഉള്ളി അരിയാൻ

വർഷങ്ങളായി ശാസ്ത്രജ്ഞന്മാരും വീട്ടമ്മമാരും പാചക വിദ്വാന്മാരും ഉത്തരം അന്വേഷിച്ച്‌ നടന്ന ആ ചോദ്യം-കണ്ണിൽ നിന്ന് വെള്ളം വരാതെ എങ്ങനെ ഉള്ളി അരിയാം. ഉള്ളി അരിഞ്ഞ്‌ കരഞ്ഞു കൊണ്ട്‌ അടുക്കളയിൽ നിൽക്കുന്ന വീട്ടമ്മ ഒരു പതിവ്‌ കാഴ്ച്ച ആണ്‌. ഞങ്ങളുടെ ഫ്ലാറ്റിൽ പാചകം തുടങ്ങിയപ്പോൾ ഞങ്ങൾക്ക്‌ ഇതേ പ്രശ്നം അഭിമുഖീകരിക്കേണ്ടി വന്നു. അപ്പുറത്തെ മുറിയിൽ ഇരുന്ന് എന്റെ കൂട്ടുകാരനായ തോട്ട(അതെ, 'എന്റെ കൂട്ടുകാർ' എന്ന 3 എപ്പിടോസ്സ്‌ ഉള്ള സീരിയലിൽ കണ്ട അതെ കഥാപാത്രം തന്നെ) ഉള്ളി അരിയുമ്പോൾ തന്നെ ഞാൻ കരഞ്ഞ്‌ നിലവിളിക്കുമായിരുന്നു. പിന്നെ, ഞാൻ അരിയുംബോൾ ഉള്ള കഥ പറയണ്ടല്ലൊ. ഉള്ളി അരിയൽ അങ്ങനെ ഒരു പേടിസ്വപ്നം ആയിരുന്നപ്പോൾ ആണ്‌ ഇതിനെതിരെ എന്ത്‌ നടപടി എടുക്കണം എന്ന് കാര്യമായ ചിന്തകൾ മനസ്സിലൂടെ ഓടിപ്പാഞ്ഞത്‌.

ആദ്യമായി ആ ചിന്ത ചെന്ന് നിന്നത്‌ എന്റെ കറുത്ത കൂളിംഗ്‌ ഗ്ലാസ്സിൽ ആണ്‌. ഒരു ദിവസം ഞാൻ അത്‌ പരീക്ഷിച്ചു. ഗ്ലാസ്സ്‌ എടുത്ത്‌ വെച്ച്‌ ഉള്ളി അരിയാൻ തുടങ്ങി. ചുവന്നിരുന്ന ഉള്ളി കറുത്ത്‌ കണ്ടു എന്നല്ലാതെ ഈ കോപ്പ്രായം കൊണ്ട്‌ കാര്യമായ ഒരു ഗുണവും ഉണ്ടായില്ല. കരച്ചിലും നിലവിളിയും പഴയതു പോലെ തന്നെ തുടർന്നു. വീണ്ടും കുറച്ച്‌ ദിവസങ്ങൾ കടന്ന് പോയി. ഒരു ദിവസം കരയാൻ തയ്യാർ എടുക്കുമ്പോൾ ഞാൻ കുളിക്കാൻ ഉപയോഗിക്കുന്ന തോർത്ത്‌ കണ്ണിൽ പെട്ടു. പിന്നെ ഒന്നും ആലോചിച്ചില്ല. അങ്ങനെ ഞാൻ കണ്ണീരിനോട്‌ വിട പറഞ്ഞു. കരയാതെ ഉള്ളി അരിയാൻ ഉള്ള ആ സാങ്കേതിക വിദ്യ ചുവടെ ചേർക്കുന്നു-

സ്റ്റെപ്പ്‌ 1-നിങ്ങൾ കുളിക്കാൻ ഉപയൊഗിക്കുന്ന തോർത്ത്‌ എടുക്കുക. തോർത്ത്‌ എന്നു പറയുമ്പോൾ കട്ടി കൂടിയ ടവ്വൽ അല്ല. ചെറിയ ചെറിയ ഓട്ടകൾ ഉള്ള നമ്മുടെ നാടൻ തോർത്ത്‌ തന്നെ വേണം.

സ്റ്റെപ്പ്‌ 2-തോർത്ത്‌ കണ്ണ്‌ മറഞ്ഞിരിക്കുന്ന രീതിയിൽ തലക്ക്‌ ചുറ്റും കെട്ടുക. തോർത്ത്‌ രണ്ടും മൂന്നും പ്രാവശ്യം മടക്കി കെട്ടി സ്വയം അന്ധൻ ആവാതിരിക്കാൻ പ്രത്യേകം ശ്രദ്ധിക്കുക.

സ്റ്റെപ്‌ 3-തോർത്ത്‌ കെട്ടിയതിന്‌ ശേഷം പരിസരം ഒന്ന് നിരീക്ഷിക്കുക. എല്ലാം പണ്ടത്തെ പൊലെ വൃത്തിയായി കാണാൻ പറ്റുന്നുണ്ട്‌ എന്ന് ഉറപ്പ്‌ വരുത്തുക.

സ്റ്റെപ്‌ 4-ഇനി സ്റ്റെപ്പ്‌ ഇല്ലടേയ്‌. മര്യാദക്ക്‌ ഉള്ളി എടുത്ത്‌ അരിയുക. (ഒരു ചെറു ചിരിയോടെ)

അടിക്കുറിപ്പ്‌- ഇത്‌ കണ്ട്‌ ഏതെങ്കിലും അഫ്ഗാൻ തീവ്രവാദിയാണെന്ന് കരുതി നിങ്ങളെ ആരെങ്കിലും തല്ലി കൊന്നാൽ ഞാൻ ഉത്തരവാദി അല്ല.

An english translation of this post is available here-crusadertvm

എന്ന് നിങ്ങളുടെ സ്വന്തം ഇതിഹാസൻ

കട്ട കലിപ്പ്‌

ഇതു ഒരു മഞ്ഞ്‌ കട്ട അല്ല. ഇത്‌ ഒരു പഞ്ഞിക്കെട്ടല്ല. ഇത്‌ വെള്ള പൂശിയ കരിങ്കല്ലും അല്ല. എങ്ങിൽ പിന്നെ ഇതെന്താണ്‌? ഇതാണ്‌ സ്വാദിഷ്ടമായ ദോശ ഉണ്ടാക്കാൻ ഞങ്ങൾ അടുത്തുള്ള മലയാളികളുടെ കടയിൽ നിന്ന്‌ വാങ്ങിയ ദോശമാവ്‌. അതെ, വെള്ളം പൊലെ ഇരുന്ന ആ ദോശമാവ്‌ തന്നെയാണു കരിങ്കല്ല്‌ പോലെ അടുപ്പത്ത്‌ ഇരിക്കുന്നത്‌. കണ്ടാൽ തന്നെ അറിഞ്ഞൂടെ എന്തു മാത്രം കഷ്ടപ്പെട്ടു കാണും ഞങ്ങൾ ഇതു ഇങ്ങനെ ഒപ്പിച്ച്‌ എടുക്കാൻ എന്ന്‌.

സംഭവം ഇങ്ങനെ. തലേന്ന്‌ വാങ്ങിയ ദോശമാവ്‌ ഞങ്ങൾ നേരെ കൊണ്ടു വന്ന്‌ ഫ്രിട്ജിൽ വെച്ചു. പക്ഷെ സാധനം വെച്ചത്‌ ഫ്രീസറിൽ ആയിരുന്നു. അതും കൂടാതെ കൂട്ടത്തിൽ ഒരു മണ്ടൻ ഫ്രീസർ മാക്സിമം ആക്കി വെച്ചു. പിന്നെ പറയണ്ടല്ലൊ പൂരം. പിറ്റേന്ന്‌ വൈകീട്ട്‌ വിശന്ന്‌ വലഞ്ഞ്‌ വന്നു ദോശ ഉണ്ടാക്കാൻ വെണ്ടി ഫ്രിട്ജ്‌ തുറന്ന്‌ നോക്കിയ ഞങ്ങൾ ഞെട്ടി തെറിച്ചു. ദേ ഇരിക്കുന്നു കല്ലു പോലെ ഞങ്ങളുടെ ദോശമാവ്‌. അതുകൊണ്ട്‌ ഒരാളെ വേണമെങ്കിലും എറിഞ്ഞ്‌ കൊല്ലാം.ഇനി ഇപ്പൊ എന്തു ചെയ്യാൻ. പിന്നെ ഒന്നും നൊക്കിയില്ല. കത്തി എടുത്തു ഞാൻ. തെറ്റിധരിക്കണ്ട, മാവ്‌ ഫ്രീസറിൽ വെച്ചവനെ കുത്തി മലർത്താൻ ഒന്നുമല്ല. ആ മാവ്‌ അതിന്റെ കവർ മുറിച്ച്‌ പുറത്തെടുക്കാൻ വെണ്ടി മാത്രം ആണ്‌ ഈ കത്തി. വെളുത്ത്‌ തുടുത്ത്‌ കല്ല്‌ പൊലെ ഇരിക്കുന്ന അതെടുത്ത്‌ നേരെ അടുപ്പത്ത്‌ കേറ്റി. ഗ്യാസ്‌ കത്തിച്ച്‌ ചൂടാക്കാനും തുടങ്ങി. കുറച്ച്‌ നേരം നോക്കിയിട്ടും അതു ഉരുകുന്നില്ല. വീണ്ടും ക്ഷമയോടെ വിശക്കുന്ന വയറുമായി ഞങ്ങൾ നിന്നു. വിശപ്പു കാരണം വയറ്‌ കരിയുന്ന ഒരു സുഗന്ധം വരുന്നുണ്ടായിരുന്നു. അല്ല, അത്‌ വയറ്‌ കരിയുന്ന സുഗന്ധം ആയിരുന്നില്ല. ഉരുക്കാൻ വേണ്ടി അടുപ്പത്ത്‌ വെച്ച മാവ്‌ കരിയുന്നതായിരുന്നു. അങ്ങനെ അന്നു രാത്രി ഹോട്ടെലിലെ മനം മടുപ്പിക്കുന്ന ഭക്ഷണം കഴിച്ച്‌ വയറ്‌ നിറക്കെണ്ട ഗതികേടു ഞങ്ങൾക്കുണ്ടായി.

അടിക്കുറിപ്പ്‌ - ആ പടത്തിൽ കാണുന്നത്‌ കവറിൽ ഇരിക്കുന്ന മാവല്ല. കവറിൽ നിന്ന്‌ പുറത്തെടുത്ത മാവാണ്‌.

എന്ന്‌ നിങ്ങളുടെ സ്വന്തം ഇതിഹാസൻ